الرئيسية » أخبار الجاليات » من النمسا. زوجة فى الغربة .. أو جثة فى التربة

من النمسا. زوجة فى الغربة .. أو جثة فى التربة

من النمسا: بقلم .. مدام هند
نهاركم سعيد وزي ما عودناكم هنتكلم في موضوع جديد وهو الاندماج؟؟
كيف اندمج في بلد بعيده كل البعد عن وطني الأم؟؟
اسمحولي اكلمكم بكل صراحه ومن غير زعل طول مانتي قاعده في البيت ومع صحابك وبتتكلمي بس اللغه الام عمرك ما هتتعلمي الماني حتي لو خدتي الف كورس انا هقولك تجربتي اول ماجيت النمسا خدت كورس وبعدها اتعلمت مع ولادي وده المهم ومفضلتش قاعده في البيت طلعت اشتغلت ومستسلمتش ولم أقف مكاني.
وللامانه زوجي واولادي شجعوني وده مهم بس الاهم هو انتي. تكوني لو عايزه تبنى نفسك؟ حطي لنفسك هدف للاسف اسمحولي اتكلم معاكم بصراحه معظم الاخوات بيقدموا علي كورسات مكتب العمل علشان الفلوس. يجب أن تختارى .. هل تريدين ان تغلقى بابك على نفسك وتظل علاقتك بالخارج دائما عن طريق من يترجم لكى؟؟ أم تريدين ان تفتحى الباب وتتعلمى اللغة ليكون حوارك مع من حولك بدون وسيط ومترجم؟
أختارى ان تغلقى قبرك على نفسك أو تخرجى تتعلمى حتى لاتكونى مثل الأطرش فى الزفة؟؟
الفلوس مهمه بس المهم تلاقي نفسك اتعلمي من ولادك اللغه. خليهم يصلحولك لو نطقتي غلط مش عيب . المهم تعتمدي علي نفسك اخرجي انطلقي اعرفي حقوقك ووجباتك اتعلمي اشتغلي وخدي الجنسيه
وكلامي بوجهه للزوج شجع زوجتك عرفها ايه اللي ليها وايه اللي عليها. معظم الرجاله بتجيب زوجاتهم هنا علشان تربي الولاد وتقفل عليهم لانه متخيل انها لو طلعت واحتكت بالناس واشتغلت وعرفت القوانيين هتتغير عليه وتكون كتف بكتف فيشغلها باللأود وشغل البيت لحد مالعمر يجري.
وهي في مكانها واقفه .ارجوكي اخرجي من اللي انتي فيه. علي فكره كلنا نقدر محدش هياخد ايدك ويوقفك علي رجلك غيرك كوني قويه اعتمدي علي نفسك خلصي مصالحك بنفسك متستنيش حد يجي معاكي علشان يترجملك او يتكلم عنك كوني قويه فخر وقدوه لنفسك و لأولادك.
تحياتي واشوفكم علي خير المره الجايه.
مدام / هند النمسا.

مشاكل الأبناء فى الخارج. كيف نتعامل معها
اولا حابه اشكركم علي ردود افعالكم الصراحه مكنتش متوقعها بس الحمدلله انها حازت علي اعجابكم .
وزي ماعودناكم المره اللي فاتت هنتكلم في حاجات تخص حياتنا وولادنا وبنفس الاسلوب العفوي الغير معقد.
والحقيقه انا حابه اعرض عليكم ازاي انا بتعامل مع ولادي وازاي بحاول احافظ عليهم من غير ما اخنقهم .
اول حاجه ازاي اكسب ثقه ولادي ازاي اخليهم يحكوا كل حاجه من غير ضغط مني اهم حاجه انك تكوني مستمعه جيده بمعني لو جه ابنك او بنتك واتكلموا معاكي وانتى غير مهتمه لان الموضوع تافه او مش مهم او مشغوله بصحباتك او معندكيش وقت هيبعدوا عنك و بعد كده تصدمى باشياء تصدمك
ولاني هتكلم علي نفسي هقولك تجربتي شوفي انا لما بنتي بتيجي تحكيلي ان صاحبتها المقربه ليها .عندها صاحب وانها عايشه معاه انا بسمعلها وقولها كملي مبتكسفش لاني لازم اواجه وافهم دماغها فيها ايه؟
ومن خلال كلامها بوجهها واعلمها ايه الحرام والحلال ايه الصح وايه الغلط مش حرام ولا عيب ان البنت او الولد يحبوا بس الغلط انهم يتعدوا الخطوط الحمراء فهميهم اننا مينفعش ندخل علاقه قبل منتجوز ولان هنا البنت والولد لما بيوصلوا ١٨ سنه بيكونوا مستقليين بحياتهم وبينفصلوا عن اهلهم وده هنا العادي وطبيعي بالنسبة لهم
بس اكيد بالنسبة لنا لا لما بنتي جت وقالتلي هو انا ممكن اخد سكن لوحدي لما اكبر قولتلها لا مينفعش وطبعا قولتلها الاسباب وفهمتها اننا غيرهم وانك بتفضلي في بيتنا اللي هو بيتك لحد متخلصي الجامعه وتلاقي انسان يناسبك وده كله بهدوء وحب وتفاهم والاهم من كده اني مقدرش اعيش من غيرك ومقولتش لا وازاي ومتعصبتش لانها هتعند لان كل اللي حواليها بيتصرفوا كده فانا فهمتها ايه المفروض يكون ومقولتش الكلمه اللي بتضايق ولادنا. وهي كلمة عيب وأقصر علي نفسي المناقشه لا .
لازم تتعلمي تحاوري اولادك تتعلمي تفكري قبل ماتتكلمي وتقولي الاسباب مش كل حاجه عيب والناس هتقول ايه. وده الغلط في حد ذاته ابنك او بنتك هيعمل كل اللي عايزه من غير ماتعرفي لو فكرتي تعنفيه وتقوليله علي كل حاجه لا وتصرخي فيه هيعمله من وراكي
رد فعل الاب والام بيتوقف عليه تصرفات ابنك وبنتك احنا في مجتمع مفتوح .انا عن نفسي لما بتوجهني مشكله بشرك ولادي فيها وبسمع راءيهم علشان اعرف طريقه تفكيرهم و كمان يحكولي لو صادفتهم مشكله وده اللي بيحصل و ثقتهم في نفسهم اكيد بتزيد حتي لو سنهم صغير اشركيه في مشاكلك خدي راءيهم ولو شوفتيه صح قوليله عندك حق مش عيب انك تقولي شكرا ولو سمحت . عارفين ايه الغلط انك تربي ابنك وبنتك زي مانتي اتربيتي خليكي طول الوقت الصديقه ووقت الجد الام مش كل حاجه زعيق وخناق وتهديد لانه هيعمل كل حاجه من وراكي وساعتها هتندمي الاحترام المتبادل والحب افضل كتيير من الاوامر والعنف .تحياتي ليكم ويارب اكون وصلت المعلومه بطريقه سهله وبسيطه منتظره ردود الافعال وانا جاهزه لاي سؤال ولو حابيين نتكلم في اي حاجه انا تحت امركم اشوفكم المره الجايه علي خير في موضوع جديد .

من النمسا.. عندما تجدين نفسك عاجزة عن الرد على سؤال ابنتك؟؟
ايه رايكم نحاول نفيد بعض ونحل مشاكلنا بالأستفادة من تجاربنا .. وتجارب غيرنا..
زى ماحضراتكم شايفيين انا بحاول اكتب باسلوب بسيط وبدون تعقيدات لغوية يعنى باسلوب عفوى جدا..
اسمي هند
عايزة اتكلم معاكم
واول حاجه حابه اتكلم عليها هي التقاليد والعادات بمعني تقاليدنا وعاداتنا الشرقيه وأولادنا وكيفية التعامل مع ولادنا
بالمناسبه انا عندي اولاد ايضا يعني وفى سن المراهقه اردت انقل لكم تجربتي معاهم يمكن اقدر افيدكم.
عندما وصلت الى النمسا مع أولادي كنت خايفه ومرعوبه.. هعمل فيهم ايه .. واتعامل معاهم ازاي.. كنت بسال ياتري هيتصرفوا ازاي؟؟ بتقاليدي وعاداتي؟؟ ولا بتقاليد الغرب وعاداته؟؟
حاجات كتيير وقلق من كل حاجه. ومرت الأيام وفى يوم فوجئت بأبنتى تفتح معى موضوع سمعته في المدرسه من المدرسة وبنت زميلتها وهو:
ازاي الأم والأب بيخلفو طفل ؟؟
فى البداية وقفت مذهولة وغير قادره على الكلام وسالتها أين سمعتى هذا الكلام ؟؟ وكنت قلقانه جدا
ورديت عليها.
قبل الحمل والخلفة لازم الاول نتجوز ومينفعش نصاحب..
كنت احاول الهرب مما سمعته منها. ممكن خجل؟ أو خوف؟ أو من المفاجاة لاأعرف سبب أرتباكى بالضبط.
وجريت فى اليوم التالى علي المدرسه وقولت للمدرسه بنتي عندها ٩ سنوات لازالت صغيره على مثل هذا الكلام. فردت قائلة انا لازم اشرح الدرس
وبنتك هتعرف هذه الامور فى جميع الحالات.
وده كان اول موقف يصادفني وكنت لا اعرف كيف أتصرف ؟ توجهت الى زوجى ووضعت امامه ماحدث
ووصلنا لحل اننا نروح اقرب مكتبه ونستعيير كتب لسنها . وفعلا وقبل ان يصلو ليدها. فتحتهم وبصيت فيهم ولاني مكنتش اعرف الماني كويس شفت الصور اللي في الكتاب وقولت لها اقرئ دول وانتي هتعرفي كل حاجه.
والكتب طبعا لسنها يعني مفهمش حاجه خارجه محاولتش اضرب بنتي او ادفن راسي في التراب واتكسف لا لانها هتاخد الحاجات دي في المدرسه وكمان لازم تتعلم ايه الفرق بين الصح والغلط .. بين تقاليدنا وعادتنا وبين الغرب وعاداته .. وبدأت أقترب من أبنتي أكثر واصاحبها واضحك واهزر معاها وكتسبت صداقتها وكمان عرفتها يعني ايه دين وأنه اهم من التقاليد والعادات..
صاحبوا ولادكم وكلموهم وقبل كل حاجه ادوهم وقت وثقه وكونوا فخورين بيهم وبدل مانقولهم عيب .. ياريت نوصلهم عيب ليه؟؟ ونسمع منهم ونفهمهم بالحوار وليس بتهديدهم والصراخ فى وجوههم.

ياريت كل أم وزوجة تكتب لنا تجاربها الشخصية والمشاكل التى واجهتها مع أولادها؟؟ وكيف تغلبت عليها..
عايزين نفيد ونستفيد من تجاربنا. لأننى أثق أنه يوجد امهات لايزالو فى بداية الطريق مع أبنائهم. يحتاجون من تجاربنا وخبرتنا. فهل من مجيب؟؟

اضف رد

لن يتم نشر البريد الإلكتروني . الحقول المطلوبة مشار لها بـ *

*