الرئيسية / المرأة والطفل / أهم١٠ حاجات لازم كل أم و أب لازم يعرفوها عن الاسهال عند الاطفال

أهم١٠ حاجات لازم كل أم و أب لازم يعرفوها عن الاسهال عند الاطفال

اهم١٠ حاجات لازم كل ام و اب لازم يعرفوها عن الاسهال عند الاطفال

1. عارفين ان اكتر من ٥٠٪؜ من الحالات اللي بيجي فيها الاهل يشتكوا ان ابنهم بيسهل ،، مش بيكون بيسهل ولا حاجة ،، و ان طبيعي جدا ان قوام البراز و لونه و عدده و كميته يتغيروا من فترة للتانية حسب الأكل و السوايل اللي بياخدها الطفل و حسب المناخ وقتها.

2. طيب بقى عارفين ان ٩٠٪؜ من حالات الاسهال ((اللي هي اسهال فعلا )) مش بتحتاج اي علاج !! ،، و ان المطهرات المعوية و المضادات اللي بتتكتب عمال على بطال ممكن جدا تضر الطفل و تزود الاسهال و كمان تقلبه مزمن مش تقلله.

3. طيب عارفين كمان ان احنا كداكترة ميهمناش ابدا ان الاسهال يقف او يقل و اساسا الصح ان احنا منحاولش ابدا ندي ادوية توقف الاسهال ده او تمسك بطنه زي ما الناس بتقول ؟؟

4. عارفة طيب يا ماما ايه هما اهم حاجتين انتي كأم لازم تتابعيهم عند طفلك لو عنده اسهال ؟!

– القيء (الترجيع) : الطفل لو بيسهل ولو عشرين مرة ،، مدام مفيش قيء و احنا قادرين نعوض الفاقد ده ولا يهمنا

-البول: طول ما الطفل بيجيب بول كويس طول ما معناه ان السوايل في جسمه مش متأثرة و مدخلش في مرحلة الجفاف .

طول ما الحاجتين طول طبيعيين يبقى هنفضل متطمنين ان شاء الله.

5. طيب عارفة ان علاجنا الاساسي هو الأكل و الشرب ؟!! ،، مش فاهمة ؟؟ يعني (نضبط أكله / نعوض سوايله) ،، بس !! ده في اكتر من ٩٠٪؜ من الحالات بدون مبالغة.

6. و ازيدكم كمان ؟؟! المفروض طبيا ان مفيش مطهر معوي من غير تحليل براز ،، لا لون البراز ولا شكله ولا ريحته يدل على اي حاجة و لا سبب كافي ان احنا نبتدي عليه علاج او مطهر.

7. ولازم تعرف يا بابا ان ابنك اللي عنده برد ،، طبيعي جدا يكون عنده اسهال ،، ماهو الفيروس بيضرب الاغشية المخاطية للجهاز التنفسي و هيضرب برضو الجهاز الهضمي ،، و زي ما قولنا قبل كده ان البرد مالوش علاج ،، بردو الاسهال ده ملوش علاج.

8. اسهال اخضر ؟؟! و ماله .. مفيش مطهر – اسهال فيه مخاط ؟! عادي ،، بتحصل ،، مفيش مطهر – اسهال ريحته وحشة ؟؟! ،، امال حضرتك عايز الاسهال يبقى ريحته عاملة ازاي ؟!! – برضو مفيش مطهر.

9. طيب اقلق امتى ؟ … اسهال مع قيء مستمر / اسهال مع ارتفاع شديد في درجة الحرارة / اسهال مع بول مش كافي او لهفة على المية/ اسهال مع دم / اسهال مع اضطراب في درجة الوعي.

10. طيب نضبط اكلنا و سوايلنا ازاي ؟!!! هنعرف ده بالتفصيل ان شاء الله في البوست الجاي عشان البوست ده طول قوي.

د. أحمد أمين دكتوراه طب الأطفال، زمالة الكلية الملكية البريطانية لطب الأطفال، زمالة الكلية الملكية الأسكتلندية للأطباء، استشاري طب الأطفال وحديثي الولادة.

عن nemsawy

x

‎قد يُعجبك أيضاً

طبيب يحذر ويطالب بتطعيم الشباب لهذا السبب

حذر مدير مستشفى رفيق الحريري في لبنان، فراس أبيض، من سلالة جديدة ...